माझ्याबद्दल

नमस्कार मित्रांनो, माझे नाव रेखा आहे. मी भारताच्या महाराष्ट्र राज्यातील प्रसिद्ध शहर नागपूर येथे राहते. मी स्वेच्छेने गृहिणी हा पेशा निवडलेला आहे. मी एक समर्पित गृहिणी आहे. त्यामुळे मी मनोभावे व निस्वार्थपणे आपल्या माणसांना सेवा प्रदान करू शकले. माझ्या माणसांचा भक्कम आधार बनू शकले. त्याचप्रमाणे ह्या तंत्रज्ञानाच्या युगाशी जुळवून घेण्यासाठी स्वत:ला जागरूकतेने सुशिक्षितही बनवू शकले. कारण माझे असे मानने आहे कि आपण आयुष्यभर विद्यार्थी बनून आपल्यापेक्षा जो कोणी उत्कृष्ट असेल त्याच्याकडून शिकत राहिले पाहिजे. शिकण्याची ही प्रक्रिया कधीही थांबू देवू नये.ह्याच समर्पणाच्या भावनेतून माझ्या घराशी निगडीत छोट्या मोठ्या कामांना देखील मी मीपणाशी नाहीतर मनाच्या मोठेपणाशी एकरूप करून प्रतिष्ठेस पात्र ठरवू शकले. परंतू जीवनप्रवासात आलेल्या काही सहज पचविता न येणाऱ्या अनुभवांमुळे माझा जगण्यातील उत्साह आपोआपच मावळत गेला. कारण त्या अगोदर मी आयुष्यात कितीतरी वेळा मनाविरुद्ध आपल्या भावनांना मुरड घातलेली होती. आपल्या इच्छा आकांक्षांचा बळी घेतलेला होता. एकंदरीत अशाप्रकारे मी माझ्या खांद्यांवर सुखदु:खाचे एक अदृश्य जड गाठोडे घेवून थकलेल्या अवस्थेत कसेबसे जीवनात पुढे जात होते. तसेच आपली संपूर्ण उर्जा त्यावरच खर्ची घालत होते. त्यामुळे जीवन जगण्याचा पुरेपूर आनंद अर्थातच मी घेवू शकत नव्हते. म्हणूनच आता मला माझ्या आयुष्यात आलेले अनुभव इतरांशी वाटून जरा हलके व्हावेशे वाटले. त्यामुळेच मी ब्लॉग लिहिण्याच्या माझ्या विचारांवर अखेरीस कृती करण्याचा निर्णय घेतला. जेणेकरून अनुभवांचा हा मौल्यवान ठेवा मला आपल्या पर्यंत पोहोचविता यावा. त्यातूनच sugandhaa.com हे लेखनाचे प्रगल्भ ठिकाण उदयास आले. ज्यात असे अनेक हृदयस्पर्शी लेख आहेत. जे वाचकांच्या मनाला भिडतील. तसेच त्याद्वारे नक्कीच जीवनापयोगी धडेही मिळू शकतील असे मला मनापासून वाटते. त्याशिवाय माझ्या कविता संग्रहातून काही अर्थपूर्ण कवितांचा लाभ सुद्धा सुगंधाच्या माध्यमातून कविता प्रेमींना घेता येईल. माझ्या ह्या साहित्याच्या प्रवासात ”लेखिका” बनण्याचे माझे स्वप्नही सुदैवाने पूर्ण झाले. आज मी माझ्या ”स्त्रीत्व” संघर्षातून सम्मानाकडे ह्या international author excellence award आणि author literary award अशा दोन पुरस्कारांनी अलंकृत मराठी पुस्तकाची लेखिका सुद्धा आहे. मला माझ्यासारख्या सर्व गृहिणी असलेल्या सखींना अगदी आवर्जून हे सांगावसं वाटतंय कि आपल्या गृहिणी असण्याला कमी आत्मसम्मानाशी जोडू नका. आपला अंतर्गत शोध सुरू ठेवा. आपल्या व्यक्तीगत रिकाम्या वेळेचा सदुपयोग करा. जगाशी जुळण्यासाठी स्वत:ला अद्ययावत ठेवा. त्यानंतर हे जग जे आपल्या गृहिणी असण्याला कमी लेखत होते. ते जगच आपल्या तेजस्वी स्वरूपाचे साक्षीदार बनल्याशिवाय राहणार नाही.